政壇：蘇澤光分享任內難忘事
貿易發展局主席蘇澤光（Jack So）尋日出席春茗活動時話，今年應該係佢最後一次以呢個身份做東請大家食飯嘞，即係佢唔會再延任，意味新一輪估新任領袖遊戲又要開始。講起任高職嘅事，Jack So話肯聽各方意見最緊要，佢透露原來「八達通」卡個名佢都有份諗，事關當時佢同啲朋友傾偈，講起有一張卡嘅設計咁厲害，可以四通八達，不如就叫「八達通」啦，好可惜當年冇去註冊申請專利。
蘇澤光話今年係最後一次以貿發局主席身份請大家食飯。（資料圖片）
Jack So任貿發局主席原定去年九月屆滿，可能無人鎮得住個場，佢最後延任。一九八五年佢已經係貿發局成員，○七年首次被委任做貿發局主席，講起在貿發局內最難忘嘅兩件事，Jack So話喺八十年代查理斯王子同已故戴安娜王妃來港主持會展開幕，戴妃仲即刻買咗件鑲滿珠仔嘅衫第日着添，會展開幕係香港嘅轉捩點，之後又有做緊上海市市長嘅朱鎔基來港開會，亦都係Jack So負責接待嘅，佢話至今仍印象深刻。
