政壇：鄉議局組黨或有變
新界鄉議局早前放出組黨嘅風聲，下周五又要去深圳舉行半日集思會，外間估計都係傾組黨參選嘅事啦！不過，主席劉皇發（發叔）尋日忽然話自己從來冇話過組黨，佢由頭到尾都只係話要詳細研究選舉部署。嘩，咁都講得出口，咪忘記近期副主席林偉強等人一直都講組黨講到興高采烈，如果冇發叔首肯，邊個敢亂講嘢呀？一係下面班鄉紳已經唔聽發叔支笛，一係就有人已經搵過發叔傾偈訓示，唔通組黨一事有變數？點都好，今次未出戰先收兵，鄉議局有排解畫嘞。
設計圖片及對白
轉軚大鬧「驅蝗人士」
林偉強自上月喺電台爆出鄉議局組黨之後，就不時喺各大媒體發放組黨嘅計劃同理念，佢仲曾經接受報章專訪時話組黨唔係十畫未有一撇嘅事，係有迫切性嘅。咁啱鄉議局尋日講到佢哋去深圳搞集思會，我哋梗係問吓發叔有關組黨嘅進度啦！點知發叔話，佢冇講過組黨，淨係話要整合鄉議局，因為好多嘢都要研究，例如鄉議局派人參選嘅勝算有幾多，又或者係咪繼續幫其他建制派抬轎等，總之咩都要傾，如果同人組隊一齊參選都可以咁話。
咁點解要千里迢迢去到深圳集思呢？發叔就話，冇咩原因，佢哋上次都三十人一齊去過惠州，咁今次咪去吓深圳囉！發叔呢個講法，明顯同林偉強之前係威係勢講組黨大相逕庭，莫非鄉議局組黨壽終正寢？記得上星期立法會辯論《施政報告》時，發叔仲狂插個人遊政策，又話旅客擠擁，香港人命苦等等，點知佢尋日竟然大鬧啲「驅蝗人士」令香港蒙羞，又認為佢哋已涉及歧視內地遊客，叫「廢官」、平等機會委員會主席周一嶽唔好「視而不見」，而要「嚴正處理」喎。莫非發叔呢啲轉軚係因為被人訓示過？
講番尋日嘅會議，除咗講到集思會，仲傾埋鄉議局成立研究部嘅事添，由執委會通過撥款一百萬元作成立研究部前期工作，包括聘請研究員同購買器材等。不過，研究部未來工作方向未定，要做啲咩都未知，就大拿拿攞一百萬元出來，似乎同話組黨一樣，都係好兒戲囉！
