風餐露宿無人問 何來廣廈千萬間
新春時節，寒流來襲，香港人剛剛度過一百二十年來最凍嘅雙料情人節，呢個時候，最好嘅禦寒活動就係排排坐、打邊爐。不過咁喎，朱門酒肉臭，路有凍死骨，對無家可歸嘅露宿者來講，莫講話打邊爐咁溫馨，唔凍死都算命大。
講開真係可悲，號稱國際都會嘅香港，唔只有人露宿，仲有愈來愈多之勢。官方資料顯示，短短兩年間，深水埗區露宿者增加逾一倍，而全港露宿者人數更加增至七百幾人，平均每一萬個港人就有一個露宿。寒流襲港之際，銅鑼灣避寒中心甚至出現人滿為患嘅奇景，有得企，冇得瞓，避寒卒之變罰企！
咁都未算慘，因為當局安排不善，露宿者雪上加霜，事關銅鑼灣避寒中心日頭係社區中心，需要舉辦活動，要等到晚上十點後至開放，加上地面污漬斑斑，被鋪傳出異味，認真惡頂。正如社區組織協會話齋，香港露宿者之所以不斷增加，皆因當局提供嘅支援措施不切實際，窮根不斷，以致一半露宿者喺得到協助後一年內又要再露宿。
露宿大軍除咗人數激增，仲出現年輕化同高學歷化嘅趨勢，年齡中位數由十年前嘅五十歲降至前年嘅四十三歲，當中四成七擁有中學或預科以上學歷，唔少甚至擁有大專學位添，咪講話書中自有黃金屋，連間茅屋都冇。
講到呢度，唔知大家有咩感覺？太一叮就諗到好多方面，一來，房屋政策太失敗，上公屋大排長龍，租私樓貴到離譜，年輕一代無瓦遮頭，被迫加入露宿大軍；二來咯喎，教育制度太不濟，堂堂大學生居然無法學以致用，讀飽書都要露宿，可能係香港地獨有嘅奇景！
露宿者幕天席地，除咗辛苦，仲分分鐘成為賊仔嘅獵物。尋日之嘛，深水埗通州街橋底又上演一場「露宿者大戰流浪漢」嘅荒唐劇，有露宿者發現擺放喺紙皮箱內嘅三千幾元利是錢同手機不翼而飛，懷疑被隔籬兩位露宿者偷去，於是上前問罪，大打出手，警方將三人一併帶署調查。唉，同是天涯露宿者，何苦窮人鬥窮人，個個露宿者背後都有段不為人知嘅辛酸故事，而隨住愈來愈多港人加入露宿大軍，類似事件必然陸續有來，香港治安每況愈下。
計太一叮話齋，有頭髮冇人想做瘌痢，有屋住冇人想去瞓街，杜絕露宿亂象，除咗加強對露宿者支援，改善避寒中心環境，治本之道就係加快興建公屋，等大家都有瓦遮頭。唔係嘅話，「紐倫港」遲早變成「露宿港」、「流浪港」，叮！
