「嗚嗚……腦細……」少膽虫一返到公司就攬實淫賤黎，淫賤黎被緊抱得透唔到氣，「晨早流流返嚟攬身攬勢做乜？情人節都過咗啦！」少膽虫含苞待放、深情嘅眼神望住淫賤黎，「虫尋日去跑馬拉松，幾驚冇氣返嚟見腦細你！」「冇氣？冇氣就唔好學人跑啦，仲要跑全馬！」

「唔係呀，臨跑之前畀人踢爆跑道嘅空氣污染爆燈，虫邊跑邊吸廢氣，咪驚吸得多，跑唔到返嚟見腦細你囉！」淫賤黎聽罷笑咗笑，「區區廢氣啫，你睇吓個天！」

少膽虫抬頭望望，赫見天色灰暗，霧霾密布，淫賤黎續講：「壹全霉隔籬係堆填區，日日新鮮廢氣傳過嚟，兼且依家空氣又唔好，日日返工都吸唔少，你都打晒底，怕啲咩？」

少膽虫面有難色，一手鬆開淫賤黎一團肥肉嘅腰部，繼而扯走淫賤黎身上嘅罩，淫賤黎嚇到叫咗出嚟，「哎呀，罩你都敢偷？」少膽虫笑笑口話：「空氣問題嚴重，都係戴番個口罩安全啲……」

第一手消息請下載on.cc東網iPhone/iPad/Android/Windows Phone Apps