城中鏡：啟剛借巨宅青聯大團拜
香港青年聯會主席霍啟剛前日喺薄扶林沙宣道霍家大宅舉行新春團拜，招待一班聯會兄弟姊妹，青聯元老級大哥黃定光伉儷、前主席李宗德、許華傑、陳仲尼、葉振都同會中核心成員近百人出席。唔少嘉賓都係第一次踏入霍家大宅石頭莊園，呢度成間博物館咁，令人大開眼界。
青聯成員許華傑（右起）、黃定光、黃太林淑儀、霍啟剛、陳仲尼、黃富榮在團拜互相問好，左一為民政事務首席助理秘書長馮浩賢。
新春團拜，當然唔可以少咗青聯嘅一眾女骨幹成員。
大宅花園內擺放咗古董大炮。
大宅嘅露台裝有一個大理石噴水池。
啟剛（左）與細佬啟山同喺大宅內長大，感情要好。
主人家一盡地主之誼，預備咗豐富嘅自助晚餐招待一眾賓客。啟剛話過往青聯會嘅新春團拜都係由幾個屬會分別舉行，為咗可以減輕秘書處同會員嘅壓力，於是佢今年就提議由總會統籌舉辦一次大團拜喇，但霍太郭晶晶同囝囝當晚就冇出席。
大炮噴泉古董滿屋
今次啟剛喺屋企搞青聯嘅新春團拜，除可慳番場租外，仲可以令大家感覺更親切，出席嘅嘉賓都大讚呢座堡壘式嘅大宅氣派非凡。呢座建於上世紀三十年代、由啟剛爺爺、已故前全國政協副主席霍英東買下嘅大宅樓高四層，從街外睇，屋嘅外牆鋪滿綠色植物，而主大樓入口外面，就擺有一對幾乎有兩個人咁高嘅石獅子，外形好威猛，入面仲有一個約七人足球場大小嘅草地花園，擺放咗兩尊古董大炮。
主人家今次喺露台同會客室安排十多圍枱招呼嘉賓，只佔大宅嘅一角，會客室內，牆壁、窗簾同傢俬等都充滿歐洲傳統色彩，而露台酒吧就有鍾馗像同大理石噴水池，總之古今中外珍品都有喇！
