政壇：搞搞政：鬍鬚曾為輸入外勞開綠燈？
財爺鬍鬚曾喺網誌講咗幾個禮拜有關預算案嘅話題之後，唔知係咪驚畀外界再鬧佢為預算案「減甜」鋪路，尋日嘅網誌改咗話題，講吓《香港經濟發展的限制和優勢》。佢話香港過去十年嘅經濟表現算唔錯，同經濟發展水平相若嘅英國、新西蘭等已發展國家比較更為明顯，大致喺百分之四嘅水平。但喺四小龍入面，新加坡嘅發展水平先係最突出，增長水平約百分之六，值得留意嘅係人哋過去十年大量輸入超過一百二十萬外勞，同埋大量填海增三十平方公里用地。
設計圖片及對白
鬍鬚曾仲話，相信港人唔一定接受新加坡嘅增長模式，政府亦唔可以將成套政策照辦煮碗咁搬嚟香港，不過相信大家都留意到香港正面對缺人、缺地嘅困難，長遠會窒礙經濟發展，所以希望社會喺政府提出嘅造地計劃同增加勞動力政策上，可取得共識，作出適當取捨同平衡。鬍鬚曾咁講，莫非想暗示政府準備就輸入外勞開綠燈？市民仲未鬧完佢喺預算案繼續做「守財奴」，依家佢講輸入外勞又挑起另一個火頭，真係唔知佢點諗？
此外，佢又以圖表解說，話本港包括金融、旅遊、貿易物流同專業服務嘅經濟四大支柱，互相撐扶香港，減少就業市場受到影響，當一、兩個支柱表現得較差時，另外啲支柱亦可以協助支撐香港經濟。所以，政府先會咁重視佢哋，實在唔應該被視為淨識「食老本」咁話。
