政壇：泛民藉五區總辭大換班
學民思潮提出就普選嘅原則性問題舉行公投，等政府提出政改方案時就可以用公投結果決定係咪支持佔領中環。白鴿黨立法會超級議員何俊仁早前已講咗願意辭職，之但係學民思潮就話要五區總辭，激進派同其他泛民議員仲爭先恐後附和，驚死冇得辭職。有泛民中人就透露，學民思潮要「玩」晒五區，其實係唔想畀一○年走入中聯辦嘅白鴿黨有機會洗底，更加唔想畀佢哋獨領風騷。
據了解，公文袋已為公投做好準備，佢哋港島區立法會議員陳家洛一直對前年未能與黨友陳淑莊雙雙入立會而耿耿於懷，如果佢辭職，陳淑莊就可重返立會，佢下屆再選亦都有籌碼在手。而九東就由梁家傑辭職，等棄守東涌、留守九龍東嘅飛機師譚文豪可提早接班。
人民力量立會議員陳偉業亦一早講咗可以為公投辭職，但由於佢哋搵唔到合適接班人，所以會由公文袋「代勞」。公文袋新界西議員郭家麒辭職，佢哋嘅黨主席余若薇就會參加補選。不過，聽聞該黨毛孟靜唔捨得辭去九龍西議員職位，所以該區就會由議員黃毓民辭職，等被視為毓民徒弟嘅黃洋達上位。
五區之中競爭辭職最激烈嘅就係新界東。前年立會選舉為該區票王嘅社民連梁國雄就有意退落嚟，畀佢助理黃浩銘接任。但人力亦都有意將「慢必」陳志全換番落嚟，畀主席袁彌明踏入立會。以佢哋嘅名氣，慢必一六年想選嘅話再轉區都唔遲。
政府當初幾經辛苦先令立會遞補機制通過，估唔到最後竟然演變成幫各黨派免費更換接班人。泛民為達目的不惜燒納稅人嘅錢，相信係是係非，眼睛雪亮嘅市民心裏有數。
