政壇：郭志一開魚場盼保生態
新春團拜都可以搞搞新意思，好似立法會漁農界議員「高佬賢」何俊賢同另一議員EQ葛珮帆前日搞嘅團拜，就帶大家去參觀流浮山一個水產養殖場。呢個講求環保嘅海斑魚場，內裏唔止有石斑，仲有龍躉，場內又有一套非常完善又環保嘅飼養系統，原來呢度係永安百貨執行董事郭志一嘅主場。郭志一話搞呢個養殖場純粹係基於自己嘅興趣同理念，絕對唔係為咗賺錢咁簡單o架！
郭志一（左）希望有朝一日養魚可足夠香港市場食用，仲可以放番一部分入海，右為何俊賢。
有機菜五顏六色，直情可以當花籃用。
郭志一自小就周圍潛，同海入面啲魚結下不解緣，所以話面對中國同香港等華人地區因飲宴對海魚嘅大量需求，佢擔心石斑、龍躉呢啲魚會瀕臨絕種，所以開個養殖場，希望有朝一日養嘅魚量供應到畀香港市場之餘，又可以將部分放番入海，嚟維持生態平衡。
高佬賢同EQ前日除咗講到漁業發展問題之外，仲請埋元朗一個有機農場嘅場主佘常光嚟展示一籃五顏六色嘅有機蔬菜。高佬賢見到就即時笑住咁話，以為係假嘢，皆因未見過啲菜可以包得咁靚，下次可以考慮送菜籃，唔使送花籃喎！
