政壇：高永文預告活雞回歸
日日都咁忙嘅食物及衞生局局長高永文，尋日晨早跑完馬拉松領袖盃，返屋企抖一抖，中午立即應老友民政事務局前常秘、「眾人媽打」李麗娟之邀，去媽打母校瑪利諾修院學校參加籌款盆菜宴。高永文雖然因禽流感爆發，民望回落少少，但「民望高」一樣大受歡迎，唔少粉絲爭住同佢影相。
設計圖片及對白
高永文（左五）帶領各嘉賓吃盆菜宴。
禁令明日屆滿
高永文好注重安全，見盆菜咁耐都未滾，嗱嗱聲叫工作人員換支新石油氣。熱辣辣盆菜材料當然唔少得雞，冰鮮雞都好好味，高永文大快朵頤，但全城關注二十一日禁雞令到星期二就會屆滿，內地禽流感爆到七彩，中港雞分流存放的選址未搞掂，本地雞農又搞入稟，餓鮮雞已久嘅市民好擔心到時究竟有無活雞食。高永文先「touch wood」，話內地雞雖然有啲阻滯，但本地雞好太平，只要呢兩日相安無事，市民可以放心，禁雞令過後，本地活雞一定有得應市，市民有得食。高永文咁識做，都係希望市民同本地雞農「收貨」啫！
立法會漁農界前議員黃容根就話，依家本地養嘅大隻雞成本係四、五十元，但政府只係賠三十元一隻，呢個賠償係二、三十年前定落，真係連通脹都追唔到，政府再唔增加賠償，啲雞農就血本無歸咁話。
講到食，跑完馬拉松嚟嘅，仲有前行政會議員成員「金刀梁」梁智鴻醫生，可能又凍又餓，盆菜一上枱，佢立即第一個裝飯食，十分搞笑。梁太馮令儀第二年陪老公支持媽打，夫唱婦隨。
出席嘉賓仲有太子珠寶鐘錶主席鄧鉅明同太太，原來「太子鄧」舊年有份贊助盆菜宴，但事忙未能出席，媽打梗係邀請佢再嚟。玩具大王蔡志明太太李惠莉贊助大會禮物，蔡太一身紅衣，喜氣洋洋出席，十分畀面。多得咁多好友襄助，盆菜宴由去年五十圍增加至今年六十八圍，媽打仲話要一直搞落去，搞夠一百圍，唔好畀佢停。
