致謝動議真無謂 不務正業惹人厭
立法會議員七嘴八舌，經過三日、合共三十小時辯論，前日終於否決咗施政報告致謝動議。唔知大家對呢件事有乜嘢感覺，太一叮就覺得由頭到尾都係一場鬧劇，致謝動議吵吵鬧鬧，不知所謂，簡直係浪費時間，浪費納稅人金錢！
其實，立法會否決施政報告致謝動議，咁嘅結果完全係意料中事。係人都知，回歸以來三位特首先後發表咗十七份施政報告，絕大部分不獲立法會致謝，尤其喺今時今日嘅政治環境下，港府動輒得咎，寸步難行，致謝動議唔被否決至奇喇。致謝動議徒具形式，早就淪為政客做騷嘅舞台，根本毫無意義。立法會每日運作要八十萬元，浪費三日時間辯論，到頭來得個吉，唔係勞民傷財又係乜！
最令人莫名其妙嘅係，致謝動議源自殖民地時代，呢啲港英政府留低嘅形式主義，早就不合時宜，點解仲要保留呢？當年港督代表英女王管治香港，係殖民地嘅「主人」，施政報告「皇恩浩蕩、陽光雨露」，立法局感恩戴德，向港督致謝一啲都唔出奇。家陣香港已經回歸十七年，官員係公僕，市民至係主人，公僕向主人報告施政綱領，係分內之事，職責所在，天經地義，有乜好致謝吖？
正所謂，做慣奴才難自棄。京官曾經批評本港公務員回歸後唔識「當家作主」，睇嚟真係一啲都冇講錯。
講開又講吖，香港政治爭拗不斷，搞到經濟停滯，民生凋敝，競爭力每況愈下，深層次矛盾不斷惡化，急需處理嘅問題堆積如山，議員居然花咁多時間去討論毫無意義嘅致謝動議，簡直本末倒置，九唔搭八。
嗱，與其不務正業，不如做吓正經事喇。港府為咗打擊樓市炒風，前年推出俗稱「雙辣招」嘅額外印花稅及買家印花稅，眨吓眼已經過咗一年半有多，但相關法案受阻於立法會，到依家仲未完成立法，你話係唔係離譜吖？最好笑嘅係，議員意見多多，五時花六時變，都唔知佢哋究竟想點。話時話，家陣樓市已經轉向，需要考慮嘅係減辣，而唔係加辣，就算「雙辣招」完成立法，都冇乜實際意義喇！
一句到尾，施政報告致謝騷年年如是，市民已經睇到厭，早就應該取消，無謂年年獻世喇。計太一叮話齋，如果立法會要保留致謝動議，不如索性請英國人返來做港督吖，笨！
