SUN奇古怪：SUN潮語：【炮 兵】SUN奇古怪：SUN潮語：【炮兵】＿
「炮兵」呢個潮語就係指一眾北上尋歡嘅男士。「炮」即係普通話「打炮」嘅意思，亦即係做愛咁解。所以，「炮兵」講直接啲，即係成日上大陸煙花之地玩嘅雞蟲。
中央電視台早前播出東莞「煙花」實况，當然呢個「煙花」唔係指年初二喺維港放上天嗰啲，而係當地全國聞名嘅色情事業。中共廣東省書記即刻帶隊做嘢，嚴打東莞嘅娛樂場所。東莞掃黃都唔係第一次，通常喺兩會期間，又或者喺領導人南巡嘅前後，周不時就會洗吓太平地。不過，觀乎今次掃黃力度同規模之大，實在唔似係做樣求其掃吓咁簡單。
呢二十幾年嚟，東莞一直都係全國第一「性城」，究其原因，全賴改革開放初期，大量港商台商喺當地設廠，離鄉別井艱辛開拓難免寂寞。同時，做生意梗要應酬嘅地方，所以由上世紀八十年代，東莞就先讓小部分人「黃」起來。九十年代至今，香港北上玩樂嘅「炮兵」團絡繹不絕，今次東莞掃黃會否令港人「炮兵」解甲歸田？
香港無服兵役呢回事，潮語「炮兵」當然唔係軍隊中嘅兵，佢哋更加唔識操作大炮導彈等軍備。但係叫得「炮兵」，佢哋又真係會操炮，不過呢碌炮唔屬於國家，而只為自己尋開心發炮。
「炮兵」有單打獨鬥，但更多嘅係組成「炮兵團」，一班男人柴娃娃上去集體作戰。呢十幾年嚟，「炮兵」喺廣東省各地嘅戰場，包括桑拿「慾」室、卡啦OK、夜總會、酒吧……等等，大戰各地胭脂盡獻銀彈，有啲仲壯烈犧牲家庭事業搭上沉船，吹簫簫兮易水寒，壯士一去兮不復還。
今次事件相信對「炮兵」帶嚟沉重打擊，亦對當地經濟帶嚟影響。有人推測今次同中共內部嘅派系權力鬥爭有關。如果係咁，東莞嘅「黃頁」就真係復業無期……香港嘅「炮兵」團，惟有乖乖哋留港建港，守護家園。又或者轉投防空部隊以高射炮對付侵犯領空嘅飛機發射吧！
