好多人都話戒煙難，但有四十八年煙齡嘅金銀業貿易場理事長張德熙就極速戒煙，戒煙時間只係四十八小時，係咪好神奇呢？張德熙話，本來都冇諗過戒煙係咁容易，但自從政府實施室內及公眾地方全面禁煙之後，就覺得食煙係一件煩惱事。常着西裝嘅佢冇理由周街「打邊爐」嘛，而且由辦公室行落街吸煙好辛苦，一來一回分分鐘煙癮又起，所以咪決心戒咗佢囉！

張德熙用兩日就戒甩咗四十八年煙癮，相當神奇。

新一份預算案快將出爐，政府會否加煙稅呢？張德熙話加煙稅嘅最大得益者可能係啲水貨煙，因為煙民實會搵到平煙買咁話。不過，政府嘅政策某程度上一定會幫咗部分煙民戒煙，因為佢就係一個活生生嘅例子喇。講到底，成功戒煙係要恒心嘅。

第一手消息請下載on.cc東網iPhone/iPad/Android/Windows Phone Apps