政壇：工聯會窒財爺博食胡
主打勞工權益嘅工聯會一直被視為基層利益政團，新一份財政預算案下周公布，唔少團體紛紛提出各種訴求，工聯會屬會「香港文職及專業人員總會」（文專總會），尋日亦由立法會議員郭偉強拉隊，組成約二十人嘅隊伍去政府總部請願，擺到明為中產發聲，仲明窒「預算案縮骨 中產得個吉」。
設計圖片及對白
政黨人士都先後向財政司司長曾俊華出招，都係希望喺守財奴財爺手中撬番啲錢出嚟，郭偉強一行尋日就提出一啲減免稅額嘅建議，其中包括好可能喺預算案推出嘅增加薪俸稅父母免稅額，唔通工聯會係收到風及時食胡？
鬍鬚曾早前已經事先張揚預算案或會減少派糖措施，文專總會尋日請願就大講中產之苦，同工聯會過去為基層權益發聲好唔同。佢哋批評財爺過去嘅預算案雖然推出咗紓困措施，但中產所得好少，即使有小恩小惠措施，但中產家庭扣除沉重稅負之後，依然係壓力最重嘅一群。如果新一份預算案連過去嘅小恩小惠都要削減，中產勢必「得個吉」。示威人士將一張抬頭為「全港中產」嘅支票交予政府，下款就係財政司司長。郭偉強一行建議要增加薪俸稅免稅額，增加中產家庭供養父母嘅免稅額等。
收「成功爭取」效果
咁啱得咁蹺，尋日已有風聲話嚟緊嘅預算案將會增加父母免稅額，工聯會同日搞請願，如果預算案真係推出呢項稅務優惠，工聯會實可以得到「成功爭取」嘅政治效果喎。
今年政治局勢波動，沉默嘅中產一群勢成各方爭取支持及代表嘅對象，依家連向來扎根基層及工人利益嘅工聯會都爭做中產代言人，其他政黨真係唔驚就假。
