回歸後的香港廢柴垃圾政府愛集郵，用香港人的血汗金錢豢養一堆廢柴垃圾，十六多年來，佢哋未有單好事做過出嚟，但瘀皮反智的，卻層出不窮，鑊鑊新鮮。

淨係睇吓那個溥儀再世的環境局長黃錦星，成舊嘢咁出嚟講香港垃圾問題，真如豬八戒照鏡，面對面，自話自說，講嚟講去三幅被，唔係話起焚化爐燒垃圾，就係埋落堆填區，又或吹風要徵費，喺市民袋裏掏錢畀佢解決佢無法解決的事情。

當一件垃圾窩囊篤眼篤鼻時，又多件出來爆響口，佢話喎，垃圾徵費諮詢期間，收到「大部分主流意見」，認為三人家庭每月徵費不多於三十元，咁係咪暗示大家接受了每人每月畀少過十蚊呢？請問？佢仲話因執行上有技術困難，「不傾向」豁免弱勢社群徵費，咁即係全港人人要科水啦！喂！你班大富貴消費力強，買嘢多，咪要掉啲垃圾相對也多咯！但那班七老八十的婆仔公公，連落樓做晨運都行唔郁，何來有垃圾可掉呢？每月卻要佢哋畀垃圾費養垃圾？咁好不公平啫！

香港近十年，垃圾激增，唔係香港人愛浪費，亦唔係本地人的環保意識下降，而係多咗好多愛掉垃圾的「非港人」每日南下湧來，香港垃圾政府啲庸官和一些不顧香港死活的利益既得者，還敢說香港經濟全靠鄰近地區的自由行強人帶挈個喎！

實體垃圾就話可以運去焚化爐燒光無眼睇啫！那些「非物質性」的垃圾思想、劣質行為、污糟手段及邋遢意識，卻無王管又無人理的情況下，以崩堤式湧入香港，此地的垃圾政府卻有親切感的迎迓，任由香港高雅文化被蹂躪，以至消失，也袖手旁觀，兼多加一腳！你話點算？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps