城中鏡：黃傑龍開年飯煮湯丸冧員工
企業要搞好勞資關係真係唔容易，好似敘福樓集團執行董事Simon黃傑龍都深明此理，早前趁初七「人日」特登同一班同事食開年飯，期間Simon同工作上好拍檔Grace高秀芝「拍住上」，除咗向員工大派應節利是外，更聯同其他集團高層一齊煮三色湯圓，加上農曆新年前已向全集團約一千五百名員工派發加薪信，講到尾都希望新一年齊心事成。
黃傑龍（左）同高秀芝煮湯丸畀大家食，分甘同味。
黃耀鏗（紅箭嘴）新正頭同員工飲杯打成一片，黃傑龍（藍箭嘴）希望業務愈做愈好。
Simon嘅爸爸黃耀鏗一直對集團有情意結，而且對員工都好有人情味，Simon對於集團嘅良好傳統當然蕭規曹隨，早前趁「人日」同同事食「開年飯」，黃耀鏗同集團高層親自落手落腳煮湯圓，煮好仲親手逐碗拎畀員工品嘗添。Simon話佢哋煮嘅係三色湯圓，有紅色、黃色同白色三種顏色，分別寓意鴻運當頭、黃金滿屋同一團和氣。
除咗黃耀鏗外，多名集團創辦人當日亦係座上客，佢哋回憶集團發展點滴，自言集團首間酒樓開業至今已有四十多年，儘管依家面對租金、原材料價格等不斷上升，經營方面自然有一定困難，但幸好有一批盡責同事上下一心，其中部分同事更係中流砥柱，由當日初級員工榮升為店長，另有一家三口都係服務集團添！
展望未來，Simon為集團繼續發展大計多多，包括計劃引入外國優質品牌餐廳到香港經營，如果將來有著名品牌決定落戶香港，到時淨係留喺香港都有食神喇！
