政壇：搞搞政：更衣室內遭偷拍 慢必全相險曝光
其實唔少同志都擔心「出櫃」後會畀人歧視，即使身為立法會議員都唔例外，好似「慢必」陳志全早前去健身室做gym（健身）時，就畀人喺更衣室偷拍。照片中嘅慢必上身真空露兩點，下半身就淨係圍住條好似就嚟會甩嘅大毛巾，頭耷耷咁睇電話。拍照者質疑慢必喺更衣室逗留長達二十分鐘，眼甘甘(目及)住其他男人，有「釣魚」搵獵物之嫌。慢必就澄清絕無其事，強調自己先係畀人偷拍嘅受害者。
設計圖片及對白
眾所周知喺更衣室內影相係犯法嘅，所以呢張相我哋唔可以登畀讀者睇喇！慢必睇過張偷拍照之後，認得當時佢應該係喺某間大型連鎖健身中心嘅更衣室入面，覺得好恐怖。佢話自己成日都會做gym，通常做完後都會喺更衣室入面嘅桑拿房焗十至二十分鐘先換衫，但一定唔會喺換衫嘅地方長期逗留，尤其出咗櫃之後，佢盡量唔會喺更衣室同廁所內同人有眼神接觸，以免惹人誤會。
慢必透露，其實「大愛同盟」成員黃耀明都提醒過佢，出咗櫃後要盡量低調，唔好去人多嘅健身室，今次真係受到「教訓」喇！佢話今後會考慮轉去私人會所，或者練習包住毛巾嚟換褲，費事畀人影到全相咁話。
