政壇：喬布斯早有驚人遠見

呢段七十分鐘訪問片段，由美國紀錄片製作人Bob Cringley喺一九九五年操刀，當時喬布斯除講創業之外，甚至預言互聯網嘅發展，節目播咗當中十分鐘嘅精華，母帶更加失蹤咗，最近搵番一份副本，訪問內容至重見天日。

當時喬布斯被問到「點睇未來十年嘅技術發展趨勢？」佢立即話：「睇好互聯網。」佢仲預言：「網絡購物將取代電視購物，最終成為最直接嘅銷售渠道。」大家唔好以為佢事後孔明，當時全球只有四千萬網民、二萬多個網站，今日嘅電子商務巨頭亞馬遜當年成立唔夠半年，但「教主」喺近二十年前已預料到電子商貿會有今日嘅發展。

喬布斯雖然係公司嘅靈魂，但要發展就要團隊合作，佢話最緊要搵到五個真正「A級」嘅人，蘋果公司嘅「Mac機」就係咁由一班精英打造出嚟。佢仲笑言，同A級人合作，從此就唔想同平庸嘅人埋堆。