政壇：泛民政黨評分齊插水
早前都講過教協監事會選舉爆內鬥，激進派韓連山同溫和派張文光分別領軍參選，互轟對方團隊不是，不論最後誰勝誰負，教協本身都肯定係輸家。尋日有民調顯示教協支持度平均分急跌零點一三分，創近年新低。整體泛民方面，激進派同溫和派之間嘅內訌更加係愈演愈烈，早前畀人掟嘢狙擊嘅白鴿黨，同埋以「佔中後援會」名義狙擊白鴿黨嘅人民力量，喺同一民調中評分亦齊齊下挫。再次證明無論係誰是誰非，搞內訌都係傷人又傷己。
香港研究協會喺上月三十日至本月六日，成功訪問一千一百多名十八歲或以上市民，就喺立法會擁有議席嘅十五個政黨政團支持度評分，結果顯示教協雖然仍然位列榜首，但實質評分就應聲下挫零點一三分至二點七四分，調查機構直指係同即將舉行嘅教協監事會選舉爆出抹黑風波有關。
調查又顯示，九個立法泛民政黨同政團當中，有六個都評分下跌，其中現任主席劉慧卿同前任主席何俊仁分別畀人掟衣架同毛巾嘅白鴿黨，評分顯著下跌零點零八分，至只有二點五八分。成員有份掟人嘅人力亦唔好得好多，評分微跌零點零一。另一經常掟嘢嘅激進泛民政黨社民連，更加跌咗零點零九分至只有二點二二分。另外街工、民協嘅評分亦都下跌，即係無分激進溫和都齊齊插水。
