行政會議成員兼立法會議員林健鋒喺農曆年假期同太太、囝囝去咗東京度假，一家三口共敍天倫。撞啱當地商場大減價仲趁新年攞番個好意頭，特登去買褲，寓意「富富貴貴」咁話。不過佢就話好彩嘅唔止係遇到大減價，仲避過咗場大風雪，順利返港添！

林健鋒同家人品嘗日本地道拉麵。（受訪者提供）

林健鋒上個月尾同屋企人去咗東京六日。佢話一家三口去旅行除咗囝囝會為行程發辦外，食嘢時仲可以多啲選擇，好似去食拉麵咁，就算唔識日文都可以叫三款唔同味道嘅湯底，到時三個人自己揀。

去東京除咗食好嘢，當然唔少得血拼啦。咁蹺遇着當地商場大減價，林健鋒用咗二萬日圓（現約一千五百港元）買咗幾袋戰利品，問佢買咗啲乜嘢啦，佢就話新正頭梗係買褲啦，仲大讚日本人好手尾，改褲剪咗出嚟嘅布都會畀番客人，唔同佢上次去泰國買褲，店員改錯褲腳仲要唔認數喎！

第一手消息請下載on.cc東網iPhone/iPad/Android/Windows Phone Apps