政壇：馮程淑儀獻辭甩轆
政府發出嘅新聞稿出現錯漏時有發生，而康樂及文化事務署署長Betty馮程淑儀就被指老貓燒鬚，其英文獻辭錯漏百出。話說Betty早前應渣打馬拉松方面邀請為今年比賽嘅場刊寫獻辭，最近有朋友報料，話見到Betty短短幾百字嘅英文獻辭，竟然發現至少五處錯誤，包括簡單如「of」錯寫成「od」、「city」則變咗「cith」等。
（設計圖片及對白）
馮程淑儀喺渣打馬拉松場刊嘅英文獻辭，被發現至少有五個錯誤。
究竟呢篇英文獻辭有乜明顯錯漏呢？資深英文科老師兼女教師協會主席周蘿茜接受查詢時舉例，指「I will the Standard Chartered Hong Kong Marathon 2014 evert succes」呢句，其中「will」一詞應為「wish」，「evert succes」應為「every success」，整句完整句子共有三個錯誤，另外篇文仲有唔少文法錯誤，例如文中有句全長三十字嘅句子，竟然一個主句都無等。
指編輯校對誤差
周蘿茜其後更為呢篇獻辭打分，打趣話呢篇文頂多值六十幾分，屬於僅僅合格，但相信呢篇文非Betty手筆，只能怪Betty嘅「槍手」同校對人員唔夠認真喎！
康文署回覆指出，經核實後，署方確認交予香港業餘田徑總會嘅文本正確無誤，「並沒有發現任何錯誤」，其後再向總會了解後，知悉總會喺其編輯同埋校對嘅過程中出現偏差，導致付印文本出現錯漏。如果康文署呢個說法屬實，就可以還Betty一個清白喇！
