火焚之年多爭拗 點止赤口惹是非

大家都知道，香港政治爭拗無日無之，由年頭嘈到年尾，幾乎日日係赤口，再咁落去盞齊齊冇運行嘅咋。好嘅唔靈醜嘅靈，玄學家指馬年係火焚年嘅第二年，亦即係「火焚三年」嘅大關口，蛇年、馬年及羊年之中，以甲午馬年嘅火勢最猛。更得人驚嘅係，香港位於馬年是非位，怒火不斷，爭拗一定唔會少。正如玄學家話齋，今年無論社會大眾定議會內外，都會充斥爭鬥同怨氣，港府施政將會繼續受阻，反對聲音比蛇年更加激烈，大規模遊行同抗爭場面更加頻繁，隨時七國咁亂都似。

信不信由你，馬年係政改決戰之年，建制派同反對派固然雞同鴨講，連反對派內部亦內訌不止，加上佔領中環蓄勢待發，外部勢力虎視眈眈，喺咁嘅情況下，香港想平靜都幾難喇。

政治係咁，其他方面同樣阻滯重重。表面上經濟似乎唔錯，失業率低，外圍環境唔算太差，實際上危機處處，隱憂重重。玄學家估計馬年經濟放緩嘅情況可能比蛇年更嚴重，內地同胞來港消費會進一步減少，而樓市股市嘅表現亦未可樂觀，金融市場可能出現動盪添。唔係危言聳聽，前朝政府得過且過，無所作為，搞到經濟停滯，民生凋敝，留低一大堆爛攤子，房屋、貧窮、安老、教育、醫療樣樣唔掂，積重難返，就算現屆政府有心撥亂反正，都無能為力喇，何況港府動輒得咎，自身難保。

好似近日咁吖，內地禽流雞殺入本港，當局除咗大開殺戒，仲一刀切禁售活雞，搞到本地雞農及雞販血本無歸，怨聲載道。呢，有位雞販為表示不滿，連續兩日跳海圖以死控訴政府，而新界雞農亦計劃農曆新年後發起遊行，甚至考慮提出司法覆核挑戰當局禁售活雞嘅決定。你話喇，新年流流就發生呢啲不幸事件，戾氣多過和氣，今年又點可能唔亂吖？話時話，內地禽流雞拖累本地雞，咪又係前朝食衞局局長周一嶽埋下嘅禍根囉，業界早就提議將內地及本地活雞分開處理，佢一直闊佬懶理，卒之搞到頻頻殺雞，雞農及雞販冇啖好食，唔怨氣沖天至奇吖。

總而言之，香港管治問題多多，社會愈來愈政治化，港人火氣愈來愈大，呢啲絕對唔係好事。適逢今年係火焚年，如果大家繼續爭拗落去，隨時搞到火燒香江都似，叮！