港台大樓終推倒 不容公帑亂咁使

送蛇迎馬，長期蛇王嘅立法會終於盡忠職守，做番一次好事嘞。係乜？咪就係逼到港台新大樓計劃自動收皮囉。你知啦，港台呢棟「勞斯萊斯級」新總部唔止係豪華，簡直係奢華，洗腳唔抹腳，使錢如倒水，家陣將佢一嘢推倒，對市民嚟講直頭係馬年第一喜訊喇。

嗱，呢單嘢真係好睇過港台嘅連續劇多多聲，造價逾六十億元嘅港台新大樓撥款申請早前被立法會否決，當局本來以為玩弄數字遊戲，提出「減磅」方案就可以蒙混過關，點不知雕蟲小技被市民識穿咗，卒之搞到官老爺宣布因未能與立法會達成共識，決定撤回方案喎，仲隨即公布就項目重新招標，預料整個項目會延誤至少兩年，最快二○二○年至可以落成咁話。

港台奢華新大樓觸礁，對納稅人係好消息，但對使慣歎慣嘅港台中人嚟講，梗係天大壞消息喇。有人話喎，對當局撤回方案感到極度遺憾及失望喎，甚至有人玩陰謀論，質疑推倒新大樓係想陰乾港台咁話。

即係咁，當局撤回港台新大樓計劃究竟有冇涉及政治因素，太一叮唔知，淨係知如果當局不識時務強硬闖關嘅話，肯定又自取其辱被立法會扑低啫。就事論事，港台只係區區一個政府小衙門，新大樓造價居然比「門常開」新政府總部連新立法會大樓仲要貴，甚至比無綫電視城嘅造價有過之而無不及，淨係呢樣已經令人火滾喇。唔通立法會明知港台大花筒，都聽之任之，隻眼開隻眼閉，咁至叫合理咩！

港台新大樓撥款方案跪低，造價驚人固然係原因，不過更大原因其實係多此一舉。本港電視業務風雲再起，好快會由兩家對壘變五家混戰，市場大餅愈分愈薄，市場競爭愈來愈激烈，港台呢個時候拓展電視及數碼新業務，同倒錢落海有乜分別吖。如果係私人企業，就算投資蝕到仆直，市民都唔會有異議，問題係港台用緊嘅一分一毫都係公帑，納稅人咬開有血有汗，如果立法會咁都開綠燈，就真係令人極度遺憾及失望嘞！

正如有議員話齋，港台新大樓造價令人咋舌，撥款申請碰釘「要怪就怪自己」喇。講真，港台百孔千瘡，烏煙瘴氣，莫講話新大樓唔應該興建，甚至港台本身都應該摺埋喇，無謂繼續丟人現眼，污染大氣電波吖嘛。嗱，如果有一日陰陽怪氣嘅港台消失，市民耳根清淨，唔使祝願都身心康泰，精神爽利！