SUN搞作：打橫嚟講：一馬當先 洪福照香江
恭喜發財！
爆竹一聲除舊歲。祝各位馬年順境、馬到功成、龍馬精神、馬運亨通、馬場贏大錢！
今年甲午屬馬，正春頭，日暖氣清，恰恰春風得意馬蹄疾，冀望今年勝舊年。
去年癸巳屬蛇，車公靈籤預示：「駟馬高車出遠途，今朝赤腳返回廬；莫非不第人還井，亦似經營乏本歸。」十分靈驗。香港諸事不利，小人當道，正符合蛇年之「蛇鼠一窩」、「蛇蠍心腸」所致；一籃子蛇蟲鼠蟻庸官廢柴，做不出好成績來。
今日，踏入馬年，託「馬」之洪福，啲霉氣一定盡除。嗱！淨係睇雞瘟（禽流感）和地震，都要在馬年來臨前發生，即係就算瘟疫地震，也得避忌這「金馬」雄威，要瘟要震，也須在蛇年內做晒佢！咪留手尾也！
縱使香港一批術數佬話今年馬年帶火，社會繼續動盪不休，各位亦毋須憂慮，因馬性靈巧跳躍，奔騰有力是正常不過的，只要大家厲兵秣馬的努力勤奮工作、快馬加鞭的搞好經濟，唔好事急馬行田，求求其其搵條友做特首，應讓全港市民做「伯樂」，齊齊有份揀fit馬，香港唔一馬當先，發到駟馬難追就奇矣！
司馬遷撰《史記》：「騏驥不能與罷驢為駟」，意指有料嘅人，堅持理念，不妥協，不與無骨氣嘅小人為伍，最後，定當馳騁千里，驃踏八方。
祝願香港馬年順境，為全球和平馬首是瞻，做個好榜樣，天下太平。
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
