SUN搞作：少膽虫手記：大年初一
大年初一，雖然壹全霉好多基層員工都無得放假，但係佢哋大部分都樂意返工，皆因一連幾日都係我哋管理層嘅荷包災難日，紅包一封一封派出，荷包一滴一滴淌血，根本就係一個將基層快樂建築喺管理層身上嘅節日，慘！
「腦腫，腦腫，恭喜發財！」呢個肥豪，一邊食住煎堆油角，一邊打躬作揖，向我伸出油淋淋嘅貪婪之手，我不情不願咁畀咗封利是佢，點知佢就斬多二両：「我個囡囡都話同你拜年，祝你步步高陞，恭喜！恭喜！」呢個奸仔，又掠我一封，遲早要你還凸！
苦難時光就像鐵軌一樣長，走了一個肥豪，又來一個膠蘇。「腦腫，腦腫，新年搵多啲！」呢條友仔平時都算聽話，我諗住可以輕易打發，點知膠蘇接過一封利是，即時大嗌：「呀！腦腫，今日咁高興，等我表演揈春畀你睇啦！」膠蘇登時上晒身，左揈右揈前揈後揈，唔知仲以為撞邪，呢一刻我終於明白，只有利是加碼，膠蘇才會過主。
正當我諗住去廁所匿一匿之際，忽然背後傳來一把陰陽怪氣之聲，「阿虫，恭～喜～發～財！」唔係嘛！淫賤黎攤大雙手，問我要利是？「速速磅唔好兩頭望！新年新作風，唔使當我腦細，講到新聞創作，你先係前輩，所以就要畀利是我呢啲後輩囉！」淫賤黎搶劫式奪去我幾吋厚嘅利是，慘遭行劫嘅我，只覺大年初一，世界冷得讓人發抖。
