禽流襲港又殺雞 防疫不力累無辜

農曆新年前夕，佛山順德供港雞場嘅活雞被驗出帶H7N9禽流感病毒，港府立即提高應變級別，尋日銷毀包括本地雞在內嘅兩萬隻活雞，並下令封閉長沙灣臨時家禽批發市場二十一日。年尾流流大開殺戒，除了大吉利是，仲搞到團年飯同開年飯都冇活雞食，極其量只有冰鮮雞上枱，你話係唔係好冇癮呢？

講到殺雞，港人早就見怪不怪。自回歸以來，禽流感頻頻襲港，港府先後五次殺雞，搞到雞毛鴨血。可惜一雞死，一雞鳴，禽流感威脅一直揮之不去，港府無計可施，淨係識得殺雞，始終解決唔到問題。

唔怪得殺雞令一出，唔止食家失望，業界亦怨聲載道。有雞檔檔主反映，原本估計年三十購入二百幾隻活雞出售，點知政府一聲令下，新春期間停售活雞，雞販手停口停，損失慘重。而本地雞農就炮轟食衞局把關不力，促請當局另設家禽批發市場同檢疫設施，將內地活雞分流處理，以免再次株連本地雞。

當局就話喎，香港地方有限，加上家禽批發市場係厭惡性設施，增建必然受到地區人士反對，短期內可行性唔高。咁講都唔係冇理由嘅，問題係，樣樣都唔得，究竟點算好呢？唔通望天打卦咯喎？

呢，禽流感來勢洶洶，不斷蔓延，唔講得笑，淨係內地已經錄得二百幾宗確診個案，最少二十人死亡，而且只係官方數字咋，實際情況必定嚴重得多。係人都知，隱瞞疫情係內地官僚嘅一貫作風，信佢一成，雙目失明，港府千祈唔好等運到吖。

講真喇，禽流感之所以成為香港嘅風土病，皆因前朝政府渾渾噩噩，一味耍花招，一時利誘雞販交出牌照，一時「日日清」，一時推銷「中央屠宰」，結果搞來搞去得個吉，日日清變成日日驚，中央屠宰計劃更加無疾而終添。

其實，隨着禽流感不斷蔓延，港府早就應該停止輸入內地活雞喇，港產官僚得過且過，拖拖拉拉，等到失守先至殺雞，遲唔遲啲吖！

正所謂，當斷不斷，必受其亂，預防禽流感，港府應該當機立斷，唔能夠猶猶豫豫。即係咁，殺雞只不過係權宜之計，最緊要制訂有效措施，真正將禽流感拒於門外，如果唔係，過年冇新鮮活雞事小，隨時爆發大規模疫症事大吖，叮！