城中鏡：朱玲玲戰衣進駐博物館
旗袍被視為最能凸顯東方女性美嘅衣着，今時今日，城中唔少名媛都好鍾意着旗袍亮相，香港歷史博物館今日起舉辦一個名為「百年時尚：香港長衫故事」嘅展覽，共展出三十七套精美長衫，包括尋日出席活動嘅最美麗港姐朱玲玲一九七七年參加選美着嗰套，同當年嘅后冠及權杖。
朱玲玲（右二）昨日身穿一襲長衫參加展覽開幕禮，右一為楊立門。
朱玲玲尋日亦精心配搭一襲長衫出席活動，佢近四十年不變嘅曼妙身材真係令人欽羨。講番呢個展覽，市民除咗可以睇到已故影星林黛、歌星鄧麗君生前所穿嘅長衫外，仲可以見到縫製長衫嘅工具、紙樣，甚至花紐等，亦可以睇到唔少唔同年代女士與長衫嘅精彩故事，真係幾特別。已向政府申請退休嘅民政事務局常任秘書長楊立門係主禮嘉賓之一，佢喺開幕詞中表示，歷史博物館會繼續徵集女性及男性長衫，作研究及進一步豐富博物館館藏。
