行花市，是中國人的高興事，光明正大的活動，毋須鬼祟出沒，所以，上星期六，維園開檔第一日，我就挺胸昂首，大踏步入去四圍（目及），與全港市民共慶佳節。

早期花市，主要係銷售年花，近年，已有所不同！最明顯的，是政治化，幾乎所有政黨政團皆在此擺檔宣揚理念，甚至歷屆特首也每年藉機巡一圈，做一做親民Show，只不過，因廢柴政府的敗政如山，令不受歡迎的官員被群眾噓爆而已！

但一些面皮夠厚的，即使冒畀人掟嘢及咒罵落地獄也無懼色，仲全程推銷政策添！呢啲「素質」（大陸語）嘅人，將來返內地，撈個政協，包無問題。

香港年宵花市，早已變質，除傳統花農幹活外，又多了一批九唔搭八嘅中學老師，話讓學生早啲認識「經濟運作」，遂帶隊投攤檔、入大陸搵廠買貨，學行銷做生意喎！也也烏勞碌一星期後，最大的得着，係終生唔再咁白癡，出錢買難受！

當然，仍有見一班又一班年輕人發揮創意，度出很多超凡意念，令花市充滿活力！

不過，另一觀察所得，有不少財團看中人潮年年遞增，已插手高價競投攤檔，將花市工展會化，狂推倉底貨尾，或一些劣質冒牌假貨。若花市被呢班大陸廠佬（目及）中，香港庶民、學生和花農點夠佢哋土豪爭呢？

一處年宵花市，應有當地本土特色，即如香港維園的，各政黨總派員代客寫揮春，這是由已故司徒華帶起的，若有天，見香港特首開檔，可寫足一天無畀人柴台的話，咁就真正和諧社會嘞！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東網iPhone/iPad/Android/Windows Phone Apps