政壇：搞搞政：劉展灝籲港商遷徙非洲
深圳下月起帶頭調高最低工資，港商勢再次為成本上漲頭痕，香港工業總會（工總）主席劉展灝（Stanley）尋日同傳媒聚會時，就建議港商「跳出」中國，諗吓將廠房搬去非洲嘅可能性，例如埃塞俄比亞同盧旺達，佢仲笑言「打支針、帶埋食糧就可以出發」添！不過，問到Stanley會唔會縮沙，佢就話非洲只適合勞動力密集嘅工種，好似造鞋、紡織業咁，暗示自己鐘錶業嘅老本行唔啱喺非洲打拚。
設計圖片及對白
進軍非洲呢條好橋原來係工總去年率團訪京時，全國工商聯副主席林毅夫同佢哋會面時提出嘅。Stanley笑言，唔少會員聽到要「遷徙」非洲都好驚訝，但佢就覺得內地同非洲國家關係友好，港商喺當地投資，最少唔會被人「蝦」，而且講番投資大計，當地勞工成本低，工人月薪講緊只係五十美元（約三百八十七港元），預計未來十年都唔會有大變動，方便港商控制成本。
