內地供港雞隻被發現感染H7N9之後,食物及衞生局前晚宣布禁雞殺雞,一班受牽連嘅本港雞農大感不滿,幾十人漏夜衝去禮賓府,幾架裝滿活雞嘅貨車仲諗住喺禮賓府兜圈,一度與警方對峙。風頭火勢之際,凌晨一點鐘突然殺出一位熟口熟臉嘅靚太,原來係食衞局政助陳凱欣,呢位電視台新聞小花風采依然,但雞農似乎唔多憐香惜玉,揶揄佢:「瞓醒喇?」

陳凱欣(右一)前晚漏夜單拖大戰雞農,唔知局長同副局長等高官去晒邊呢?

有在場人士更埋怨,已為人妻及媽媽嘅陳凱欣似乎無備而來,一味只勸雞農返屋企休息,有咩事第二日慢慢傾,好在班雞農見到靚太咁辛苦都冇特別為難佢,擾攘多半個鐘就和平散去,陳凱欣大戰雞農都勉強算功成身退。有知情者話,前晚曾經call過局長高永文同副局長陳肇始,可惜一個飛咗去電話留言,一個唔喺香港,本來期望至少都有常任秘書長或署長級人員到場調停,但最後要陳凱欣頂晒,認真慘情。

第一手消息請下載on.cc東網iPhone/iPad/Android/Windows Phone Apps