政壇：廠商會選舉爆種票疑雲
傳統四大商會之一嘅中華廠商聯合會（廠商會）今年八十周年，年尾改選會長，近日卻傳出種票疑雲。我哋收到風，話廣東社團總會主席王國強（KK）創立嘅九龍城工商業聯會，近日發信廣邀會員加入廠商會做「普通會員」，仲講明入會費同首年年費由廠商會副會長吳永嘉（Jimmy）全數贊助，咁樣「包底」招兵入廠商會？Jimmy話今次純粹誤會，而KK就澄清係秘書搞錯，未來幾日會發信畀會員解釋喎！
早前有消息傳出，會長施榮懷嘅接班人，如果第一副會長陳淑玲唔做會長，會係副會長顏吳餘英同李秀恒之爭。前哨戰都未開始，近日就流傳一封九龍城工商業聯會發畀會員嘅邀請函，除咗介紹廠商會，仲提到該會創會永遠會長KK嘅好友Jimmy，想推薦各位以公司名義申請加入廠商會做「普通會員」，Jimmy會贊助入會費同首年年費。呢件事非同小可，Jimmy聽到都打咗個突，話自己從來冇咁講過，唔明點解封信咁寫。Jimmy好老實話識咗KK好多年，適逢今年廠商會八十周年，最近見親KK都叫佢搵人入會，但從來冇講過贊助會費招兵喎。
至於係咪有意選立會，Jimmy話係一六年嘅事，就算真係選都唔使咁早決定。佢又發毒誓話真係一場誤會喎。我哋之後再問KK，佢話的確有人包底，但包底嘅人係佢喎！又話今次真係唔好意思，仲話為免麻煩，索性墊支都唔搞，等會員自由決定係咪入會。
