前候任特首辦項目主任馮英倫,雖然有傳獲邀出任發展局局長政治助理,但佢未有因此而停下腳步,最近同香港青年聯會副主席吳傑莊、理工大學專業及持續教育學院資訊科技總監陳繼宇等十多人,組成名為「香港起動」(Hong Kong Actioneers)嘅政策智囊組織,睇怕無論馮英倫係咪加入政府,都會繼續多多搞作。

吳傑莊(左三)聯同陳繼宇(右三)等人組成政策智囊組織「香港起動」。

吳傑莊介紹,「香港起動」早於去年八、九月開始醞釀成立,暫未設立召集人同發言人制度,佢哋打正旗號希望提出政策可落實嘅主張,其中頭炮會喺今年五月初政改諮詢結束前,提交政改建議方案,並希望年底前可以發表首份政策研究報告,預期一年經費約一百萬元,暫由各成員自掏腰包集資。

當問及倘有成員加入政府,會否擔心與組織見解不同造成尷尬,馮英倫強調佢哋唔會強加任何觀點或立場畀任何人,吳傑莊就話對外界以二分法標籤不同團體感到厭倦,重申佢哋歡迎各方理念相近人士加入。

第一手消息請下載on.cc東網iPhone/iPad/Android/Windows Phone Apps