香港電台位於將軍澳嘅新大樓造價過高一事仲未解決，最近政府拋出造價減七億元嘅折衷方案，企圖再闖立法會，但立法會資訊科技及廣播事務委員會尋日討論施政報告相關政策時，多名議員繼續批評新大樓造價驚人，要求港台「應使則使、慳得就慳」，又問到底有否「Plan B」﹖議員嘅態度搞到商務及經濟發展局局長蘇錦樑、廣播處長鄧忍光冇晒符，佢哋不約而同使出靠嚇招數，威脅話會連服務都提供唔到，呢招唔知算唔算發爛渣博過關？

設計圖片及對白

搬行會擋箭

工程界議員盧偉國喺會上指出，港府早前向立法會提交新大樓「減磅」方案，造價只係減少約七億元，質疑港台將來嘅製作規模與大樓是否匹配？民建聯嘅葛珮帆就話，公眾支持港台興建新大樓，但規模及裝潢必須「應使則使、慳得就慳」，言下之意係港台嘅新方案未達呢個要求囉！至於獨立建制派謝偉俊更絕，佢直頭質問港台有冇「Plan B」，似乎已經為拉倒撥款做定準備咁。

蘇錦樑重申，新大樓設計係經招標得出，經過上次削減之後，依家嘅改動空間已經唔多，反問議員喺○九年當初支持港台增加新服務，點解依家又反對興建新大樓？佢講講吓都好唔客氣，明言呢啲行為係：「唔知邏輯何來」。鄧忍光上次開會答問題已經標晒汗，今次佢就搬出行政會議嚟作擋箭牌，話○九年行會賦予港台數碼廣播、媒體資產管理及社區廣播等新服務，擬建嘅新大樓設施已係最基本，若最後沒有新大樓，港台難以沿用現有設施來履行這些新服務，「港台同事想做都做唔到」，鄧忍光呢個說法算唔算「Plan B」呢？

第一手消息請下載on.cc東網iPhone/iPad/Android/Windows Phone Apps