扒手集團出沒 年關小心破財

呢，近日WhatsApp瘋傳有內地扒手黨透過個人遊專程來港犯案，甚至出動五至七歲小童出手偷銀包，女賊扮家長負責接贓，專攻花園街等購物熱點。之所以採用呢種「家庭作業」模式，主要有兩大目的：一來咯喎，用細路仔降低獵物戒心，容易得手；二來咯喎，一旦失手，女賊都容易博同情甩身吖嘛。

眼見「扒手家庭」襲港搞到人心惶惶，警方話喎，舊年已經接獲有關訊息，但旺角警區至今無發現有關案件喎。

實情係咪咁呢？本報記者專程到花園街向檔戶求證，發現好多人都中過招，內地扒手非常猖獗，偷錢有之，偷貨亦有，甚至連檔戶買來自享嘅幾斤生果都唔放過。就講上月之嘛，有位花園街店舖職員親手截獲一名懷疑接贓嘅內地孕婦，雖然對方一度跪地求饒，但店員拒絕姑息養奸，最後報警將佢拘捕。

咁就奇怪喇，內地扒手明明已經人贓並獲送官究治，但警方就話「無發現有關案件」，究竟因乜解究？計太一叮話齋，大概只有兩個可能性，一就係執法先鋒瞌眼瞓睇唔到，二就係警察叔叔擘大眼講大話，又或者，兩個情況同時存在囉，叮！

講真，內地扒手來港搵食都唔係第一日啦。舊年頭十一個月，全港共發生近一千三百宗扒竊案，其中中區警署接獲近二百宗，超越前年全年數字，而負責花園街嘅旺角警區首十個月就發生二百幾宗。扒竊黑點遍布各區鬧市，除咗花園街，仲包括油麻地佐敦道交界斑馬線、旺角朗豪坊、尖沙咀金馬倫道同重慶大廈近清真廟斑馬線、港島天后至大佛口沿線東西行電車、銅鑼灣崇光百貨斑馬線、時代廣場、利源東街同中環置地廣場等。文雀無處不在，警方一個瞌眼瞓，市民真係好易中招o架！

內地扒手猖獗，社會影響惡劣，又點止破財咁簡單？家陣中港關係好似水溝油咁，水貨黨、奶粉黨已經搞到天下大亂，再加埋內地扒手黨蜂擁南下食大茶飯，亂上添亂，身受其害嘅香港人容乜易火遮眼遷怒旅客，將所有來港同胞當賊辦o架？

面對扒手集團長驅而入，警方固之然要加強巡邏，市民都應該提高警惕，好好看管自己嘅財物，因住漏財惹禍。都係嗰句，小心行得萬年船，大一叮預祝各位龍馬精神，金銀滿屋，共度平安、快樂嘅馬年新春！