城中鏡：馮國經撐自家呔即買即戴
有英國著名男裝品牌尋日喺沙田馬場舉行盃賽，利豐集團榮譽主席Victor馮國經都不忘買番條自家品牌領呔以示支持到底，盛惠八百幾蚊，佢仲即場換上新呔。
馮國經（右）睇中一條限量版領呔，即場戴上，叫太太畀意見。
Victor搞盃賽，富商好友都嚟撐場。現場設有品牌專櫃，Victor同太太到場後喺專櫃前仔細打量，好快睇中一條限量版綠色呔。Victor拎上手後愈睇愈鍾意，索性將領呔戴上，馮太都笑咪咪話滿意，叫老公戴住新呔出席盃賽。千金馮詠儀都配合大會主題，由頭到腳一身翠綠打扮。佢頭上頂禮帽，凌晨兩點先至由美國運抵香港，原來因當地大風雪，航班一度延誤，幸好最後有驚無險。
女童軍總會香港總監彭徐美雲嘅囝囝Victor彭穎生都即場睇中一件黑色西裝，尺碼Fit晒，埋單找數六千蚊。但最大嘅驚喜係大會安排即場購物一定金額，可以喺著名球星奧雲手上得到簽名足球一個。但奧雲簽咗一個波就走，Victor係唯一嘅幸運兒。
