城中鏡：鐘錶界猛人學做廚
每年一度嘅瑞士高檔鐘錶展SIHH，係鐘錶界名人採購嘅年度重要盛會，結婚未夠兩個月嘅喜運佳主席Karson蔡加讚親自拉隊去探索來年嘅時尚潮流，而做鐘錶生意嘅香港工業總會主席Stanley劉展灝，同埋香港鐘錶業總會前主席「華哥」梁青華都有同行。
劉展灝（左）同梁青華戴起廚師帽學做大廚炒蘑菇。（受訪者提供）
虞茱迪（左）跟廚師學煮帶子。
蔡加讚（右一）同一班鐘錶業界先進參加一年一度嘅瑞士高檔鐘錶展SIHH。（受訪者提供）
人人有頂帽送
華哥話佢哋係應某國際知名品牌邀請，先飛到法國停留三日，期間去博物館欣賞世界一級古董珠寶展覽，六百件價值連城嘅稀世珠寶，包括全世界最大嘅四百七十八克拉藍寶石，仲有印度皇室佩戴嘅珍貴首飾，實在令人大開眼界。近排內地加大反貪腐力度，令鐘錶業受到波及，咁一班行家入貨爽手定謹慎咗？華哥話正常入貨，預計今年市道應該唔會太差，事關明天會更好嘛！
喺法國期間，佢哋一行二十多人拉隊去世界排第一嘅餐廳Ecole de Cuisine歎晚餐，老闆Alain Ducasse親自招呼。時尚名人虞茱迪亦在場，雖然佢唔係做鐘錶行業，但應品牌邀請去享受VlP之旅。眾人歎美味帶子同黑松露之餘，仲捲起衫袖下廚學做世界一級大廚。華哥同Stanley都戴上廚師帽學炒蘑菇，大呼過癮。當晚最後每人仲有禮品收，就係一頂廚師帽喇！
