政壇：搞搞政：林偉強篤爆鄉議局無大將

林偉強尋日出席一個電視節目時幫手解畫，話鄉議局組黨後，黨員唔應該局限於鄉議局成員，因為依家局內有三分一人，包括執委同顧問都冇鄉事背景，又或者係非原居民，所以只要佢哋唔同時戴其他政黨嗰頂帽，就可以代表鄉事派參選。至於依家喺其他政黨排緊第二、第三梯隊嘅局方成員，佢就呼籲大家要取捨，該局會招攬佢哋回巢，鄉議局亦有信心可於來屆立法會選舉穩取兩席。至於點解要組黨，佢話因為依家啲建制派都有自己嘅理念，為咗鞏固票源會犧牲同僚，所以鄉議局一定要有更多代表喺議會，先可避免下情不能上達。

對代表參選者要求咁低，即係就算組黨成功，個黨都好鬆散啦，唔通發叔之所以話組黨，其實只不過用嚟嚇人、講數？

再講，鄉議局嘅顧問的確有唔少人，但弊在好似新民黨田北辰、富貴黨田北俊同代表廠商會嘅林大輝等顧問，都唔係鄉事派成員。搵呢啲冇鄉事背景嘅人士嚟參選，到最後係咪肯用鄉議局名義出選真係好難講。