風水命理向來都係信則有,不信則無,立法會勞工界議員郭偉強尋日出席所屬嘅工聯會喺維園擺年宵嘅開幕禮時,自爆自己流年犯太歲,雖然佢自己覺得冇乜嘢,但佢嘅雙親就大為緊張,叫佢快啲搵時間去寺廟攝太歲,以求來年趨吉避凶。

郭偉強(左一)流年犯太歲,父母叫佢快啲去攝太歲,以求趨吉避凶。

郭偉強自言,對於風水命理一無所知,素來覺得只要心安理得,凡事就可以迎刃而解,不過既然父母叫到,佢都樂意去做。佢又話兩老近日多番提醒佢,叫佢呢一年內最好少啲去醫院探病同出席喪禮。

除咗工聯會外,唔少政黨都有喺維園年宵擺檔賣產品,當中唔少都係以諷刺時弊為主,其中社民連繼續大賣「你呃人」攬枕,又擺咗一隻約七呎高嘅路福西畀市民影相,社民連副主席吳文遠話直接捐錢嘅人仲多過買嘢嘅人。究竟呢個說法有幾真?相信年宵結束埋單計數時就會一清二楚喇!

第一手消息請下載on.cc東網iPhone/iPad/Android/Windows Phone Apps