政壇：張文光組隊爭教協話事權
繼香港教育專業人員協會理事韓連山早前公開宣布組織「進步教師同盟」參選教協監事會後，教協副會長張文光尋日亦宣布組織「薪火相傳」十人團隊，競逐監事會十九席位。對於「進師盟」早前公開抨擊教協近年成為民主黨B隊，以及立場模糊等指控，張文光反擊指對手作風激進，仲話擔心一旦當選會引發會員退會潮。睇嚟教協內鬥愈演愈烈。
張文光（左）否認教協係白鴿黨B隊。
張文光自從退居副會長同無做立法會教育界議員後，較少喺幕前露面。佢尋日聯同一眾教協理事、前線老師宣布成立「薪火相傳」競逐教協監事會，當中包括擔任教協理事三十四年嘅陳漢森同埋支聯會常委徐漢光。早前「進師盟」宣布參選時力數教協不是，批評教協近年淪為白鴿黨B隊。
張文光反駁指，教協從來同民主黨切割，反而韓連山走嘅路線偏激，仲不時游說會員參加佢所屬既保衛香港自由聯盟活動，擔心偏激人士當選，會引發會員退會，仲話如果因為教協管理層嘅轉變，而影響同支聯會日後合作關係，會好遺憾咁話。
