政壇：星星箍票猛送高帽
政府最快首季再將擴建將軍澳、屯門、打鼓嶺三個堆填區向立法會財委會闖關，環境局局長「星星」黃錦星吸取上次失敗嘅經驗，接連出席受影響區議會推銷並聽取議員「吐苦水」，尋日為咗掘票山長水遠去咗立法會議員陳克勤嘅粉嶺辦事處，仲讚克勤仔讚到「天上有地下無」添！星星突然送高帽畀克勤仔，想必係睇中克勤所屬嘅政黨建仔有十幾票，想一次過箍實啲票免得再「走票」喇！
設計圖片及對白
克勤仔第七個議辦尋日喺粉嶺聯和墟開幕，佢喺黨內主打環保議題，星星自然要畀面撐場，仲帶定鞋油趁機同克勤仔打好關係，疑似為之後三個堆填區闖關做足準備。星星致辭時大讚克勤仔好勤力，為地區、政府同市民做好溝通橋樑，由空氣到垃圾處理問題都同政府通力合作，之後星星講講吓仲用克勤仔嘅名嚟作咗副對聯，話「克己有理 勤政有為」喎。
克勤仔明言唔賣帳
當問到係咪想為擴建三個堆填區撥款申請提早拉票，星星未有正面回應，只係話自己收到邀請，就嚟支持吓克勤仔。克勤亦疑似同星星統一口徑，自言呢次只係搵對口單位官員主禮，好開心局長一收到邀請就答應出席。至於該黨喺擴建三個堆填區撥款嘅投票意向，克勤仔話要同地區商量先會再作決定，未有因星星捧場出席活動就即時「賣帳」。
講番議辦開幕禮曾發生小插曲。話說克勤仔致謝辭時，突然有陣大風，將成個舞台嘅背景布幕吹倒，仲向嘉賓座處傾斜，好彩一眾嘉賓反應夠快，齊齊撐住個布幕。克勤仔見狀即刻「補飛」，話好彩出席嘅嘉賓個個都係猛料，佢就有足夠後台撐得住喎。
