橋唔怕舊，最緊要受，《禁止層壓式推銷條例》已生效兩年幾，但層壓式騙案仍然禁之不絕，最近甚至變本加厲，不斷有市民上當受騙，尤其係入世未深嘅年輕人最易中招，唔少人為搵份工，結果誤墮陷阱，搞到血本無歸，欲哭無淚。

港府宣傳廣告聲稱家陣市民醒目咗，騙徒冇咁易得手喎，事實係咪咁呢？警方資料顯示，○九年至去年九月，已有十間公司被舉報涉及層壓式騙案，三十九人被捕，證明層壓式推銷從來冇消失過。呢，有位大專生為咗搵兼職，被朋友介紹到一間表面上賣保健品，實際上係層壓式推銷嘅公司。公司經理以「困獸鬥」方式游說佢入會投資，仲話只要再介紹其他朋友做「下線」，就會有一成佣金落袋。公司仲製作「秘笈」教會員點樣拉「下線」，列出「九大必答質疑」，包括死口不認係層壓式推銷，呢位大專生經不起游說，卒之畀咗三千元「投資費」，就咁被拉落水。咪以為畀咗三千元就算吖，公司經理仲不斷要求會員加碼，死纏爛打，搞到你不勝其煩，聽講有人畀咗幾萬甚至十幾萬元都甩唔到身，問你怕未！

為咗揭穿層壓式推銷真相，本報記者不惜以身犯險，深入一間公司「放蛇」，結果被「軟禁」足足三小時先至脫身，一般人若定力不足，肯定好快跌入陷阱，後果不堪設想。期間公司經理大吹特吹，聲稱只要畀三十六萬元「投資費」做「高級經理」，擔保好快就可以買樓買車喎，你信唔信吖？

唉，呢個世界邊有咁大隻蛤乸隨街跳吖，不法之徒就係睇準年輕人入世未深、心急搵錢嘅心態，先至有機可乘咋。太一叮諗極都唔明，以前就話冇法例監管啫，家陣《禁止層壓式推銷條例》都實行兩年幾喇，點解騙徒一樣咁猖狂呢？講起咪又係當局監管失職，執法不力囉。正所謂，世不患無法，而患無必行之法，當局以為立咗例之後騙徒就會自動消失，於是關人個關，有乜法子唔出事吖。層壓式騙案禁之不絕，無辜市民不斷中招，港府同幫兇冇乜分別嘅咋。

大千世界，無奇不有，騙徒手法層出不窮，層壓式推銷只係冰山一角咋。好似電話騙案咁吖，雖然係舊橋，但連見慣世面嘅女明星湯唯都中招，簡直不可思議。講到底，萬變不離其宗，騙徒來來去去都係嗰幾招啫，只要大家提高警惕，記住便宜莫貪，佢哋就無所施其技嘅喇。當然，最重要都係港府要加強執法，唔好令香港呢個金融中心淪為騙徒天堂吖，叮！

第一手消息請下載on.cc東方互動iPhone/iPad/Android/Windows Phone Apps