SUN搞作：網絡小說：潛逃．狂想曲
「傻的嗎？你以為做完啲傷天害理嘅嘢咁就走得甩？同貪曾一樣，簡直影衰我哋香港人！」入境處職員手一橫，攔截了企圖潛逃的犯婦人，準備要逮捕她。犯婦人逼得發困，只好大叫：「我……我……我其實唔係香港人！」
「吓？！」職員聞言，只能呆對犯婦人。
「是咁的，我家在廣西。」犯婦人立刻澄清，犯婦人一五一十交代自己如何響應號召賣了香港層樓到廣西做生意的發迹史。「你知啦，廣西梧州龜苓膏咁出名，嗰度都係賣一蚊盅，運到香港就算發晒霉呀，賣到貴一貴呀，啲人都係照搶，咁想唔發達都幾難！所以班後生仔呻乜嘢無機會啫，叫老竇賣咗層樓畀你打本開糖果屋囉！咩話你老竇係瞓街嘅？咁咪努力投胎囉……」犯婦人滔滔不絕。
職員只好打斷她：「等陣先，咁同你犯嘅事有咩關係？」
「無呀，唔同嘅身份唔係可以有減輕或增加罪行嘅效果，好似有錢人呀，教徒咁呀，唔係不嬲都係咁咩？」犯婦人認真兼天真問。
「你啱，」職員幫她扣上「孖葉」：「不過你家在廣西，暫時未有國師級學者提出『兩廣自治』，sorry。」
