SUN搞作:SUN官場現形記:告密
李衞喺班救護員度聽到個秘密,靜雞雞走咗去搵消防處處長鑫鑫,一於嚟個大告密,踢爆班救護員嘅嘢!
李衞:聽講班救護員話要去食大茶飯喎……
鑫鑫:唔係啩!堂堂救護人員,做埋啲咁嘅嘢,你有冇聽錯?
李衞:梗係冇啦!參與人數好似有成千人添……
鑫鑫:成班人一齊做啲違法嘅事,佢哋唔驚畀人拉?
李衞:佢哋話為勢所逼,唔做唔得呀!
鑫鑫:有冇搞錯,竟然好人好姐走去打劫咁離譜!
李衞:咩打劫呀!講緊班救護員示威完去擦餐勁呀!佢哋平時做嘢扒兩、三啖飯就要出車,依家仲唔擦餐勁點對得住自己!不過冇預處長你喎!
鑫鑫:班友作反呀!