城中鏡：恒生總廚賽馬會獻技
中環恒生銀行總行嘅佳餚美食數都數唔晒，秋冬至有嘅蛇羹更係一絕。平日一向只為恒生尊貴客戶服務嘅恒生廚房，上星期破例派出宇宙最強行政總廚陳錦成師傅，喺賽馬會沙田會所凱旋廳擔任客席廚師，為一百名馬會會員炮製多道佳餚。
恒生廚房行政總廚陳錦成
花膠五蛇羹
今次菜式包括恒生博愛堂招牌名菜 「花膠五蛇羹」，湯底採用鮮雞、雲腿、赤肉同陳皮等，再配以滋補花膠烹製，美容補身一碗過，聽個名都feel到有幾名貴。其餘精彩美饌仲有「金盞玻璃蝦球」、「雲腿官燕釀竹笙」、「香草焗蟹蓋」同「龍井茶燻雞」等，又係聽個名都流晒口水。
恒生同賽馬會合作多年，所以今次派出頂級大廚獻技，陳師傅之前喺國金軒擔任行政總廚，仲獲得法國美食協會專業廚師勳章，更兩度奪得旅發局頒發嘅美食之最大賞至高榮譽金獎，大有來頭！
