城中鏡：國泰請單親家庭遊機河
扶貧委員會轄下社會參與專責小組下月起推出為期半年「築福香港」運動，其中國泰航空將率先喺本月二十六日（星期日）舉辦「香港精神‧空中之旅」活動以示支持，屆時將派出國泰最新「香港精神號」客機，免費招待來自北區、深水埗、天水圍同大角咀等一百六十五名基層單親家庭市民，喺香港上空遊機河約個半小時，據聞特首梁振英到時亦會抽空同基層市民同遊添！
梁皚亭（左三）話嚟緊嘅周日將免費招待逾百名基層市民「遊機河」個半小時。
國泰企業傳訊總經理梁皚亭介紹，佢哋會透過香港聖公會麥理浩夫人中心、香港青少年服務處等四個機構舉辦比賽，包括有四格漫畫、風箏設計等等，甄選出活動參加者，活動參加者年齡最大為七十四歲，最小則為六歲，佢對於國泰員工踴躍報名成為當日義工感到欣慰。
其實，國泰搞類似遊機河回饋社會嘅活動亦非首次，近八年已有至少三次同類活動，今次活動喺正農曆新年前舉辦，為節日增添咗唔少氣氛。
