城中鏡：陳鄭玉而行善顯仁愛
崇奉儒釋道三教嘅圓玄學院日前舉行慈善晚會暨同心關懷耆腦之夜，博愛醫院主席曾耀祥、仁愛堂主席Connie陳鄭玉而等善團都出錢贊助，互相支持打氣。Connie最唔話得，除咗捐支票、獻唱籌款外，仲掏腰包投得珍貴嘅黃翡翠曲奇禮盒。咁啱農曆年將至，栩栩如生嘅曲奇餅放喺屋企當應節全盒，夠晒貴氣吉祥。
陳鄭玉而（中）瞓身支持籌款，湯修齊（右）同陳承邦（左）以主人家身份答謝。
陳李妮（左）抽空去唱歌籌款，與陳國超（中）同陳承志（右）父子喜相逢。
翡翠曲奇禮盒。
載歌載舞添氣氛
當晚數百賓客現身同樂，圓玄學院主席陳國超、副主席Henry湯修齊等人齊出動，陳國超大仔陳承邦同細仔陳承志亦幫手招呼賓客，佢哋兩兄弟都係圓玄學院委員。當晚籌款目標係為認知障礙症患者同佢哋家屬提供服務，希望協助患者提升自理能力之餘，亦提供支援畀照顧患者嘅家屬。咁有意義，難怪一眾名人瞓身幫手籌款，Henry亦載歌載舞，氣氛加倍歡樂。
香港玉器商會會長羅志光都有到場，佢捐咗黃翡翠曲奇供慈善拍賣，五塊曲奇利用翡翠本身嘅色澤紋理雕刻而成，栩栩如生，出席賓客激烈出價競投。經過幾輪激烈叫價，最後由Connie以十萬八千元投得心頭好。Connie話好鍾意立體雕塑擺設，所以一見就鍾意。
博愛醫院副主席Lily陳李妮亦獻唱籌款，嫁作馬來西亞新抱嘅佢年年都喺當地過年，今年年廿六就會同丈夫飛返馬來西亞，除夕食完團年飯後即啟程去澳洲度歲。佢話澳洲正值夏天，聽聞氣溫高達四十度，第一次過咁熱辣辣嘅新年喎！
