政壇：搞搞政：鄉議局組黨得個吹字
新界鄉議局主席劉皇發尋日話正在構思組黨，又話屆時會喺內部進行篩選，先派人出選。但鄉議局咁多年嚟都只係幫人抬轎，且以舊年立法會選舉成績所見，鄉議局成員為主力嘅新界東、西兩條隊，得票似乎並唔理想，再從佢哋早前因反對政府將西灣村等地納入郊野公園，而啟動嘅籌款活動成績所見，幾個月都只係籌得三十幾萬元，原先預計嗰百幾萬就失晒蹤。咁唔團結點組黨呢？睇嚟佢哋都係得把口吹水。
設計圖片及對白
鄉議局執委會尋日除咗通過由發叔領軍設立小組，籌辦委員會研究組黨嘅事外，仲提到早前因反對政府將五十幾幅「不包括土地」納入郊野公園，而設嘅「維護權益．廿元捐款運動」，以及上水古洞南村村代表曾家新就早前有村民因新界東北發展計劃要搬遷而自殺嘅事件，呼籲鄉議局要齊心，佢仲話會捐出五千元以鼓勵大家。
講起捐錢，鄉議局嘅廿元運動經過幾個月時間，相關小組委員尋日話佢哋唔理解個結果，因為籌得款項並唔理想，實收只有三十二萬多元，口頭認數嗰三萬元都未收到。所以小組就特別搞咗個kick-off，由秘書處即時攞出捐款箱逐一遞畀各執委，慷慨解囊嘅執委就獲拍照一張，發叔即時好主動咁喺衫袋攞出兩張金牛投入捐款箱。
