政壇：富貴黨示威畀甘仔鬧爆
富貴黨青年團尋日朝早喺行政會議外示威，爭取設立聘請外傭免稅額，點知就撞到一直協助居港權人士嘅甘浩望神父（甘仔）。甘仔見到該黨示威，即時火都嚟埋，斥責該黨自私，仲以匹夫之力大叫口號，喺度高呼要求將外傭工資加到一萬元，又話要支持新移民攞綜援喎！估唔到富貴黨青年團主席李梓敬等人，又似足小學雞咁大反擊，甘仔叫乜嘢，佢哋就反對乜嘢，喺度你一句我一句。
甘浩望神父（右一）指住富貴黨青年團成員（左）嚟鬧，鬧該黨自私。
但最搞笑嘅係，富貴黨青年團係示威初哥，可能平日冇嚟開，唔知道原來保安只係會畀一至兩個代表入去行會出面嘅示威區，佢哋一行十幾人好有氣勢咁嚟拉起橫額，最終只得六個人入到去，認真(火羅)爆。相反，同場嘅民協作為示威常客就醒目得多，五個人到場，五個都以不同職稱順利入晒去，富貴黨真係要學吓嘢喇！
