政壇：衝擊公聽會學民累街坊
話說立法會政制事務委員會日前就政改諮詢舉行兩場公聽會，激進泛民支持者試過撕爛《基本法》、又用《基本法》當廁紙，連同五名學民思潮成員在內嘅六名激進泛民支持者，上周六更擅自「出位」，企圖衝向官員席上嘅政制及內地事務局副局長劉江華抗議，保安阻截示威者期間非常混亂。事件逼到立會急急研究修訂處理同類事件嘅指引，變相收窄日後與會者嘅活動自由，估唔到細路闖禍，最後累街坊收場。
立會行政管理委員會尋日召開特別會議，商討學民仔衝擊公聽會事件，當日在場保安不但要撲出攔截，雙方糾纏期間仲好似玩七人欖球兼滾地葫蘆咁。據了解，有成員建議要求市民入場前先登記身份證，避免有人白撞或惹禍後唔肯確認身份。亦有建議秘書處趁市民入場前或喺獲分配座位上，派發《立法會（權力及特權）條例》內容，等佢哋知道唔係人人都可以好似尊貴嘅議員咁，鍾意就掟蕉、掃枱呢啲美麗誤會。
此外，有成員認為應再培訓各事務委員會正、副主席嘅危機處理技巧，若再上演同類鬧劇時應該點樣好似球證咁吹罰違規球員。據理解，目前大家都較為傾向要求市民入場前先出示身份證登記嘅做法。換言之，以後市民出席立會公聽會好可能要登記身份證，亦加重秘書處嘅工作量，咁對大家都冇好處，認真累街坊。
