依家政壇腥風血雨,政界人物一有疑似利益交換,即被各界窮追猛打。立法會議員林大輝尋日提早同傳媒拜年,專登揀咗銅鑼灣一間日本料理,老闆原來係一○年港姐冠軍陳庭欣。

林大輝(右)當年揀中陳庭欣(左)做港姐,依家又幫襯佢間日本料理。

大輝話當年佢做港姐評判時,一早揀中陳庭欣,最後陳都不負所望奪冠。雖然佢同陳庭欣係好友,但冇恃熟賣熟,尋日餐飯畀足正價,連加一都畀埋,絕無延後利益喎!

大輝講起餐廳老闆係陳庭欣嘅時候,一講曹操、曹操就到,陳庭欣即場現身同大家打招呼,兩人仲合照留念添!

人面廣嘅大輝,當然唔止同娛樂圈中人稔熟啦,最近佢再成為不同政黨拉攏對象,因為公民力量同新民黨即將搞「婚事」,大輝身為公民力量成員,唔知佢會唔會順理成章加入埋新民黨呢?大輝就斬釘截鐵話,短期內保持獨立身份會好啲。

雖然大輝現時無黨派,但依然頭帶幾頂帽,最近新界鄉議局執委梁福元就提案大輝擔任鄉議局顧問,而且獲全體人士通過,似乎大輝已瞄準鄉事派票源,直選之路愈來愈近喎!

第一手消息請下載on.cc東網iPhone/iPad/Android Apps