政壇：肥佬黎認衰遲早再變契弟
壹傳媒老闆肥佬黎早前聲言《爽報》好快就會收支平衡，佢賣親就正契弟，雖然佢冇賣到《爽報》，但係就因為嚴重虧損要執笠，畀員工鬧佢仲衰過契弟！尋日佢接受電台訪問時直認自己「已經衰咗」，「做乜、撐乜，嗰樣都死」，又自稱壹傳媒一年被抽咗兩億元廣告。問佢會唔會賣《蘋果日報》同《壹週刊》止蝕，佢聲言幾多錢都唔賣，以免再次被人話係契弟。但肥佬黎以前都講過唔會出售台灣業務，最後又反口，睇嚟佢遲早都要做多次契弟喇！
肥佬黎喺節目中聲稱，被啲「喺大陸好大生意嘅公司」抽廣告，最近連銀行廣告都抽晒，「一年冇嘅廣告，應該有兩億」。問佢會唔會賣埋《蘋果》同《壹週刊》，佢聲言幾多錢都唔會賣，否則就會變成「千古罪人」，「就算有幾多錢，都唔會脫到做契弟呢個罪名」。
倘「蝕到飛起」會執《蘋果》《壹週》
不過，問及佢會唔會好似早前摺埋《爽報》咁，遲啲連《蘋果》同《壹週刊》都要執笠收場？佢就坦言：「如果蝕到飛起，我都頂唔順，不過依家唔會」。肥佬黎講嘢一時一樣，反覆無常，自己員工都呃，本身經營不善又賴人抽廣告，睇嚟《蘋果》同《壹週刊》遲早唔係賣盤就係執笠收場，話唔定會被人鬧多次契弟，大家就要放長雙眼睇吓係唔係喇。
